Go ka na sa GEG Quezon City

ni Argel M. Pascua

Inilunsad ng Department of Education- Schools Division Office of Quezon City ang Google Educators Group sa pamamagitan ng pakikipagsanib pwersa nito sa Google para mapataas ang kakayahan ng mga guro sa larangan ng paggamit ng ICT. Ito ay pinangunahan ng ating butihing Schools Division Superintendent, Dr. Jenilyn Rose B. Corpuz, CESO VI, at masipag na IT Officer na si Gng. Maria Cristina N. Marquez noong ika-29 ng Abril taong 2020. Ito ay nabuo sa pakikipagtulungan ng ICT Section, mga ICT Coordinators ng bawat paaralan at sa masusing patnubay ni G. John Darryl Mercado, IT Officer, GEG Quezon City Mentor, upang mapabilis ang pagproseso ng pag-apruba sa GEG QC sa Google.

Bilang tugon sa panahon ng pandemya at pagkakaroon ng online class, ang bawat ICT Coordinators ng lungsod ay nagkaroon ng pagsasanay sa mga productivity applications ng Google nitong Abril 27, 29 at 30, 2020. Sinundan ito ng paggawa ng accounts ng mga guro sa bawat paaralang kinabibilangan ng mga ICT Coordinators.

Nagkaroon din ng pagsasanay ang mga nasabing piling guro ng bawat paaralan sa lungsod sa aplikasyon ng Google noong nakaraang Mayo 19-21, 2020. Ang mga guro ay hinati sa labing-anim na grupo. Bawat grupo ay may itinakdang Lead Moderator, Asst. Moderator, at mga tagapagsanay. Ang mga productivity tools na naibahagi sa kanila ay ang mga sumununod: Google Meet, Google Docs, Google Spreadsheets, Google Forms, Google Classroom, Google Slide, Google Drive, at ilang mga extension gaya ng Google Meet Attendance at Google Grid. Sa pagtatapos ng kanilang pagsasanay, sila ay inaasahang ituro sa kanilang kapwa guro sa paaralan ang kanilang mga natutuhan at sumali sa Google Educator Group sa Lungsod Quezon.

Matapos ang nasabing mga pagsasanay tungkol sa Google Productivity Tools sa mga paaralan na ginanap sa kanilang mga Virtual In-Service Training, tunay ngang hindi mapasusubalian ang naitulong nito sa mga guro upang mapaunlad ang kanilang kakayahan sa ICT.

Inaprubahan na ng Google ang 520,000 user accounts para sa depedqc.ph Google Suite for Education. Sa ngayon ang Facebook Page ng GEG Quezon City ay umabot na sa 5,328 likes at 6,754 followers. Dito nakalagay ang mga video tutorials, mga presentasyon at ilang mga bagong impormasyon patungkol sa Google Educators Group.

Talaga namang nakamamangha at malaki ang ambag ng Google Educators Group sa kamalayan at kakayahan ng mga guro sa Lungsod Quezon, pahuhuli ka ba? Maki-GEG na!